لمدونة جديدة بس اسمها و تعريفها قدام, من نص سنة 2008 , كنت عاملة مدونة بنفس الاسم و التعريف كان هدفى منها انى احاول استعرض المواقف اللى بتحصلى فى حياتى و افهم هى ليه بتحصل كدة و هل انا لوحدى اللى بتحصلى المواقف دى و لا كل الناس, اتكلمت فيها عن الثانوية العامة, و أول ايام الجامعة, و عن التخن و الخسسان ,و عن اخلاق المجتمع و قيمه, و اتكلمت عن الأوضة بتاعتى اللى على طول مش بوضبها, عن طريقة تفكيرى فى الأمة و المجتمع, عن عيلتى و إزاى بنتعامل مع بعض, و اتكلمت عن حاجات كتييير اوى و كان اهم حاجة عندى اقولها بشكل ساخر و ناقد و مضحك و الحمد لله كنت مكونة صداقات كتير و المدونة كان بيدخلها ناس كتير لحد ما جيت على تانية كلية و سبتها خالص لدرجة انى نسيت الإيميل و الباس وورد و يوم ما حبيت ارجعلها معرفتش, قمت عاملة المدونة الجديدة دى بنفس الاسم و بنفس الوصف, بس الوصف زاد فيه كلمة واحدة, و هى انى " بحاول " اكون بطبيعتى فى كل الأوقات, لأنى زمان كنت على طول ببقى بطبيعتى و بتعامل بتلقائية لكن مع الوقت مبقتش بعرف ابقى على طبيعتى, لأنك كل ما بتكبر كل ما حاجات كتير اوى لازم تحطلك حدود و لازم تفكر كتير قبل ما تتعامل, المدونة إن شاء الله هتكون زى بتاعتى القديمة و هتكلم فيها عن كل اللى انا شايفاه فى الحياة و بيثير اهتمامى حتى لو حاجة عبيطة و برضه إن شاء الله هيبقى بنفس الأسلوب الساخر
التدوين وحشنى اوى :)
No comments:
Post a Comment